पुणे : बावधनमधील गोयल गंगा इंटरनॅशनल स्कूलमधील विद्यार्थ्यांनी यंदा पर्यावरणपूरक दिवाळी साजरी करण्यासाठी स्वतःच आकर्षक कंदील, तोरणे आणि रंगीत पणत्या तयार केल्या. त्यांना या कामात पालकांनीही उत्साहाने मदत केली. रंगीबेरंगी कागद, खडू, माती यांच्या साह्याने मुलांनी सुंदर आकाशकंदील आणि नक्षीदार पणत्या बनवल्या.
छोटी,छोटी मुले अगदी उत्साहाने रंगीत कागदांचे कंदील बनवण्यात रंगून गेली होती. पालकही त्यांच्याबरोबर रममाण झाले होते. रंगीबेरंगी कंदील, पणत्या आणि मुलांचा उत्साह यामुळे अत्यंत उत्साहाचे, आनंदाचे वातावरण येथे निर्माण झाले होते.
‘दिवाळीच्या उत्सवात आपल्या कुठल्याच कृतीतून पर्यावरणाला हानी पोहोचणार नाही. याची सर्वांनी काळजी घ्यावी,’ अशी भावना स्कूलच्या संचालिका सोनू गुप्ता यांनी व्यक्त केली.
